Drita Lushi
SOT JAM NJË TJETËR
Sot ndjehem një tjetër.
Më shihni dhe ju?
Mos ndoshta dielli lindi më heret?!
A ndoshta dita më e bardhë erdh’?
Mos ndoshta yjet m’u puthën me shpirtin?
A hëna mbolli ëndrrat në gjumin tim?
I shoh kaq qartë,
i ndjej, sepse mbrëmë ,
pushova në zemrën tënde.
Shoh si më afrohet bota,
si rrotullohem bashkë me Tokën, lehtë,
e me prekje zgjoj dhe planetë te tjerë.
Ej!
Qenka mirë brenda zemrës tënde.
Ej!
Të rri dhe një natë tjetër?
Pranon?...
Atëherë po rri më shumë,
derisa te mos më lësh më të iki.
Dua të shkel çdo ditë
rrugëve të zemrës tënde,
të eci zbathur, të ndiej të ftohtin,
të nxehtin.
Dua të më prekin në inde
e t’i prek me jetë;
dua stinët t’i bëj vit brenda teje,
e ti të jesh vitet e mia të jetës.
Më muros, a më mbaj robinjë,
ose më jep liri të fluturoj,
po qiell të kem zemrën tënde,
pa re,
pa shi,
me diell,
me dritë!
Brenda teje, jam një tjetër…
No comments:
Post a Comment