Shpëtim Kurti - FLOKËQENDISURA ME GËRSHET

Shpëtim Kurti

FLOKËQENDISURA ME GËRSHET
 
Na ka hije, apo s’na ka?!
Moj flokëqendisura me gërshet!
A s’luajmë çetash...?! Ehu, ha!
Sa mote shkuan! Sa mall, sa vjet..!

Na ka hije, apo s’na ka ?!
A ta prish gërshetin nyje-nyje?!
Të  qeshim  fort me: A, ha - ha !
Derisa në qiell, të çelin yje...!

Na ka hije, apo s’na ka ?!
A s’kacaviremi për kumbulla të pabëra?!
Të rendim si dikur,  Hej kush e ka!
 Me këmbët që përvëlonte rëra...!

 Na ka hije, apo s’na ka?!
 Po si të mos e kujtojmë atë moshë shegushe?!
 Paçka se i rrudhur sot paksa,
 Jam engjëlli yt, moj engjëllushe...!