Kozeta Zylo - ME ABC-në KAM VËNË KURORË

 

Kozeta Zylo

ME ABC-në KAM VËNË KURORË

 

Të ndjej shtator në palcë të librit,

Për ABC-n se ç’më rrëmben,

Qindra poezi ju mësova nxënësve,

Dhe në gjunjë rashë për Mëmëdhenë.

 

Trishtuar ika acarit të Shkurtit,

Lotin e ngrirë lashë mbi tryezë,

Ndërsa me nxënësit dhimbshëm u ndava,

Kur 97-ta hapte varrezë...

 

Nga larg më vjen si kujë e çmendur,

Me Hënën strukem si në legjendë,

Me ABC-në kam vënë kurorën,

Ndërsa divorcin e kam një tmerr.

 

Dhe ëndërr e bukur s’thinjej kurrë,

Tokës premtuar Shqipen çelte,

Është e mahnitshme realizuar,

Gjoksit i shkul brenga dhe derte...

 

Kur dëgjoj nxënësit që flasin shqip,

Dhe porsi bletë mblidhen në klasë,

Nga mjalti i tyre shërohem, s’vdes,

Dheut të huaj ringjallem prapë…