Thani Naqo - Ç’M’U NGRIT MENDJA PËR RRUGË

Thani Naqo

Ç’M’U NGRIT MENDJA

PËR RRUGË

Ç’m’u ngrit mendja të nisem për rrugë,

Për rrugë të largme. Vallë do mbrrij?

Atje, ku vesa mpikset në rrudhë,

…Të mbrrij, mjafton, të mbrrij.

Ç’m’u ngrit mendja për miq e shokë,

Pleqve të tretur t’u ndez qiri.

Përshpirtje për ta e, ç’bëhet në botë,

…Më prisni, patjetër do vij.

Ç’m’u ngrit mendja të kapërcej pragje ,

Të shaloj trungun veshur me myshk.

Nën yje të fle. Të bije në ngasje,

…Mes bari dhe kashte e byk.

Ç’m’u ngrit mendja të rrëmbej njërën,

Kories të dalë. Kaçakshe të pres.

Në mos ardhtë, t’i këndoj këngën:

…“Të prita, gjer në mëngjes!”

Ç’m’u ngrit mendja për rrugë të largët,

Parajsës time t’i ngulem strumbullar.

Përqark të vijnë kuajt e kaltër,

…Jastëk, mjafton, një samar…

           *   *   *

“Ah, të mjerin, e treti mërgimi”

Do thonë kritikët për dengun me vargje.

(Hall i madh!) kur të ndjek dyshimi,

...Në rrugë të largme, të largme…

Ç’m’u ngrit mendja të nisem për rrugë?

Ngarkuar me vargje… Vallë do mbrrij?

Atje, ku vesa të mpikset në rrudhë,

…Mjafton, i gjallë, të mbrrij…