Përparim Hysi - FËMIJËRIA

Përparim Hysi 

FËMIJËRIA

Fëmijëria një natë shkurti

Erdhi, më gjeti në Tiranë

Zgjohu,gjumash,nga gjumi

Se dhëntë kanë marrë mushanë   *

U zgjova,sakaq, i tramaksur

(mos dhëntë do bëjnë zarar?!!!)

U turra pas zërit zbathur

Siç bridhja vite e vit më parë.

Çava në shkurre e ferra

Hyra në pyll me nxitim

Në pyll më është shtroera  **

Se dimër është. Thëllimë.

Dhe aty,në mes  të pyllit

Seç ndeza një zjarr bubulak

Pa pirdhu, i them, thëllimit

Tek thekem pak e nga pak.

Bukën e misërt nxjerr nga trasta

E thek mirë e mirë pranë zjarrit

Sa shije kjo bukë më paska

Lëpij gjuhën nga thërrmijat e djathit.

Si dëndem mirë e mirë

Ujët gllë-gllë kthej me pagur

Fëmijëri ! Ta  dish mirë :

-Vjen ti dhe s'jam më burrë.

Burrë nuk jam.As plak

Jam ai djali çapkën

Në  Tiranë? Jo.Aspak.

Tek mushaja jam.Me dhënë...

*mushaja- kullotë e përbashkët

** shtroera- i mbrojtur nga era e të ftohtët.