Kostaq Duka - DY POEZI

Kostaq Duka

MARRËZIA

Që bota

ka pasur e do ketë

të mençur e te marrë,

është aksiomë që s’vihet në dyshim.

Çështja është

si të bëjmë

që të mençurit të na hapin udhë,

pa lënë të marrët të marrin drejtim.

Duket e thjeshtë

por sa e vështirë,

sidomos kur vetë populli marroset

pas klithmave

buzëqeshjeve, lajkave të marrëzisë.

SUPA

Supën

mund ta hash

Në një bujtinë anës rruge

dhe lodhjen nga ecja nëpër natë

ta përgjysmosh.

Supën mund ta hash

dhe në një restorant luksoz

me lugën e argjentë,

lëngun e ngrohtë ngadalë ta shijosh.

Supa,

mrekullia e artit kulinar,

pasaporta

e kuzhinierëve të botës mbarë.

E megjithatë,

s’ka si supa

në një tavolinë të thjeshtë,

nën çatinë e shtëpisë.