Vangjush Ziko - YLBERI I MANDELËS

Vangjush Ziko

YLBERI I MANDELËS

The world learned

how to live together
as a rainbow of colors.

Teresinka Periera

Ai lindi nën qiellin me re

të Afrikës.

Të zeza ishin retë

dhe fati i saj i zi.

Nga luanët mori

krenaren grifë

Nga gazelat,

butësinë që di të bëhet fli.

Retë me dorën e tij me kallo

i mblodhi

(siç mblidhnin skllavet

pambukun e vjelur)

thesin e zi

mbi kurriz e hodhi

dhe ia vuri përpara botës

për ta djegur.

Dhe ndodhi çudia e kontinenteve

tymi i zi u bë ylber,

Ylberi shumëngjyrësh

i racave të njerëzve.