Vangjush Ziko
LYPSARËT
Jam ulur në një kënd të globit,
ku kryqëzohen paralelet e
meridianët,
ku fryjnë zefirët dhe murlanët,
ku rrugët e zogjve shtegtarë
kryqëzohen
me korridorët e aeroplanëve.
Jam ulur në qoshen e lipsarëve.
Bethoveni i shurdhuar luan
Pasionatën,
Van Gogu pikturon renë e zezë të
korbave,
Homeri i verbër vajton hirin e
Trojave,
Shekspiri me zërin e Lirit të
hakëruar
mallkon pjellën e tij të padenjë,
Uitmeni mbi oqean' e shterruar
ka hedhur urat e poemave
të lidhë kontinentet...
Njerëzit kalojnë indiferentë.
Lypsarët dorën s' e kanë shtrirë,
as berenë s' e kanë lënë për tokë,
s' kanë dalë për mëshirë,
për një lopkë,
Lypin pakëz dashuri prej Botës,
për vetë Botën.
No comments:
Post a Comment