Luan Xhuli - PËR NJË “ASNJËHERË”

Luan Xhuli

PËR NJË  “ASNJËHERË”

Per vite te tera mblodha nektar

per te patur nje pike mjalti

ne kete finish te vone.

U perpoqa per nje kujdes te tille.

Neqoftese do tu duket i hidhet,

i thate,

pa ngjyren  dhe aromen e duhur,

qysh tani po u them

se dhe lulet ne livadhet qe heshtin

u rriten ne thatesire merzie…

Une,

asnjehere s’do te ndihem blete,

asnjehere,

Perveç se  nje grerez

me endrra udhetuesi,

ku ndihem dhe frymëmarr…! 

                                        2013

Vullnet Mato - PUTHJET NËPËR ËNDRRA

Vullnet Mato

PUTHJET NËPËR ËNDRRA

Kur adoleshencës

po i shkoja në skaj,

bota më thërriste

horizonteve tutje.

Vajzat më dukeshin

mrekullia e saj, 

dhe netëve me to

ëndërroja puthje.

Gjatë  asaj kohe

putha vajza dhe nuse,

nga më të bukurat

që kishte bota filmike.

Në perde kinemaje

putha artistet ruse:

Zvjetllanën, Ljudmillën,

Tatjanën magjike.

Putha Luçien, Nailen,

Pagarushën, Anitën,

me zërat drithmëtar

të zogëzave të pyllit.

Putha aktore Tinkën,

Violetën, Margaritën,

që më luanin brenda

skenës së shpirtit.

Po kur putha të parën

bukuroshe në realitet,

m’u duk se kish te buzët

gjysma hëne në vezullim.

Shkrepi një vetëtimë,

sikur putheshin retë    

dhe u dehëm sqep më sqep

si dy fajkonj në fluturim...

Fatmir Terziu - INDIFERENCË

Fatmir Terziu

INDIFERENCË

Indiferencën tënde e ndjej. Sytë
e zgjojnë me shamatë qepallash,
nën vetullat e mia zbret ngadalë,
jam vetë indiferent dhe topitem,
një shuk dëbore që shkrin nën bark,
të lutem zgjoje paksa stuhinë,
që lamë viteve të tëra larg.

Durimi vallëzon çmendurisht,
për vitet e gjata që na kanë vënë poshtë,
është e natyrshme të mbarsemi me fjalë,
si xhaketa të varura në gozhdë,
në dashuri, indiferenca është mjaltë,
që lyen të gjitha mbërtheckat,
pa to gjithçka është e zhveshur,
si vetë zhveshja e ngarë nga indiferencat.

Kujtojmë se indiferenca është entitet më vete,
edhe në fushën me hoje mjalti,
lundrimi në dashurinë tënde,
natyrshëm që lindi nga vetë fati,
për të sfiduar indiferencën më vete,
syri im është vetë fakti,
ku ti e dashuruar përjetë mbete.

Agim Bacelli - DUA TË JEM RRUSH...

Agim Bacelli

DUA TË JEM RRUSH...

Dua të jem rrush "Shesh' i Zi"
Të rritem, piqem në hardhi.
Të mbushem nëpër kazanë,
Të më pin' e të më hanë.

Të jem makar "Afuzali"
Nëpër pjata plot dashuri.
Të jem mish për fukaranë,
Për zengjin' vënë mënjanë.

S'mund të harroj të jem "Kallmet"
Të shtrydhem si gjiri kur pëllcet.
Të nxis këngën, tund gjith' fshanë,
Në valle të ngreh gjyshbabanë.

Pa të jem edhe një " Shiraz "
Me verë kupat mbush e zbraz.
Rininë ta bëj prush e zjarr,
Pleqëris' ti bëhet zemra mal.

S'dua të jem lëng i huaj
Por gjak në mish-shpirtin tuaj.
Bashkë me ju të qesh e qaj,
Shok besnik në të mir' e faj!

Abdi Pergjegja - TURP I BUKUR APO MORAL I...!

Abdi Pergjegja

TURP I BUKUR APO MORAL I...!

Kur këmisha e moralit si mbulon njollat e turpit,
turpi s’ka turp ,te ndjehet i mbuluar.
Këmisha e turpit rri ngjit mbas trupit,
Këmisha e moralit ndjehet e turpëruar....!

Të më gjykoni është kaq e lehtë.
Në koshin e plehrave të dyja do t’i flak.
Lirshëm do dal rrugëve të qytetit,
Siç thotë populli im, krejt cu(p)llak.

Ju nuk do të qeshni më me mua,
ndonëse nën hundë do pëshpëritni.
"Se unë tashmë turpin e kam zbuluar,
Turp duhet të keni ju që e fshihni !".

Turpi e Morali, dy komshinj të mirë.
Nuk venë e vinë, por rrinë në një kat.
Ata njeri-tjetrin kanë pasqyrë.
Kur njërit i troket dera dhe tjetri e hap.

Te kesh apo t'mos kesh turp!...

Kaman Myftaraj - ËNDRRA E NATËS SË MAGJISHME

Kaman Myftaraj

ËNDRRA E NATËS SË MAGJISHME

Ti gjumin e bën të ëmbël, e mes ëndrrash të bukura,
Shëtit lule më lule si bleta që mbledh nektarin,
Pastaj vjen drejt meje gjithë gëzim e krahëhapur si flutur,
Bashkë me rrezet diellit më sjell ngrohtësi e më nxjerr mallin.

Teksa bën gjumin e ëmbël ëndrra të çon shumë larg,
Përtej oqeanit në bukuritë përrallore të papara kurrë,
Përpëlitesh mbi shtratin e ngrohtë me çarçafët e bardhë,
Dhe flet me përçartjen e gjumit e trupi të digjet si furrë.

Ti je shumë larg prej meje, por në ëndërr më vjen përnatë,
Si engjëll buzagaz, më puth e më lot gëzimi në sy më thua:
I dashur, ti zemrën ma ke pushtuar me një ndjenjë të zjarrtë,
Oh, sa dëshirë kam që kjo ëndërr e bukur, të të sjellë tek mua!

Por edhe kur vjen mëngjesi e dielli të bie mbi shtrat,
Ti s’mundesh t'i hapësh sytë e nga ëndrra s’do të largohesh,
Sepse është ëndrra më e bukur e një dashurie si në përrallë,
Kur natës së magjishme i lutesh, që tek puthjet të afrohesh...

Liljana Furxhi - TË NDIEJ NE SHPIRT

Liljana Furxhi

TË NDIEJ NE SHPIRT

Ripe lëkurën time që nga koka deri në maj të gishtave
dhe mbështillu me të.
Vetëm atëherë do ndiesh ethet, zjarrin, lotin, që ziejnë,
digjen, për ty,
pa zë!

Merre frymën time bashkë me gjithë zemrën që vuan
dhe përqafohu me to.
Vetëm atëherë do ndiesh flladin, rrahjet që të përkasin,
thërrasin për ty,
veç dëgjo!

Merri sytë e mi , shkuli me gjithë qerpikët që pikojnë
dhe mbulohu me to.
Vetëm atëherë do rrëqethesh, do ndiesh diellin që fle
nën qepalla për ty,
veç shiko !