Skënder Rusi - PUTHJE NË RRUGË

Skënder Rusi

PUTHJE NË RRUGË

Ata po puthen, e po mirë,

                   le të puthen,

Le t’i shtojnë kësaj dite

             marrëzinë e vet!

Veç e veç ata janë mëkatarë,

Kur bëhen një

                   ata janë një shenjt!

 Ata po shkrihen,e po mirë,

                      le të shkrihen,

(Bota e tërë ka lindur

                             nga ky art!)

Ku mund të gjesh

          dhe ndonjë nuancë grije,

Dhe ndonjë shi prej vjeshte

                             që të lag!

Ata duhen, e po mirë,

                             le të duhen,

Si  dita me natën

                           që rrinë  afër!

Ata veç e veç janë mëkatarë,

Po krijojnë një shenjt

                   kur puthen bashkë!